„Kaj słyszysz śpiyw tam idź tam dobre serca majom” widać ,że coś w tym jednako musi być skoro Zespoł Ludowy „Karolinki” s Jankowic wele Rybnika przetrwoł aż tela lot. 22 siyrpnia klupło mu 55 lot. Toteż geburstak tak zocnej Jubilatki zgromadzioł wiela znakomitych osobistości.

Po uroczystej mszy św Zespoł i zaproszyni goście poszli fajerować na miejscowy szpilplac. Powiycie 55 lot to piykny konsek czasu …ano piykny ale sztukom je tak dugo śpiywać bo pszeca i ludzie i moda sie zmiynio. U Karolinek najwyży zmiyniły sie łoblyczki. Jak tak se porównać stare i nowe fotografije to widać różnica. Piyrwej stykły jakiś kiecki ,zopaska ,bluza i chustka ciepniynto na ramiona.Tera we piyknym stroju slonskim kieryn dostali 5 lot tymu na Abrachama /50 lot/ łod szefowej GOKiR prezyntujom sie przepiyknie. Jak wlezom na bina to łoczy słuchajoncych aż sie śmiejom a jak zacznom śpiywać to serce rośnie. Byli tacy co tyż prugowali być jak to sie godo „na fali” toż wytrzimali yno pora lot ale niy Karolinki kiere majom we swojim repertuarze stare i te nowsze pieśniczki. Te stare ślonski wysznupane nie wiedzieć kaj bez szefowa Zespołu p.Cecylio Chromik i kierownika muzycznego Adama Kuśki som takimi perełkami .Niy było by tak kejby nie wymiynione szefostwo Zespołu. To Łoni trzimiom Karolinki twardom rynkom do kupy a noty za ta ich wytwałość widać na kożdym kroku. Członkowie Zespołu rozumiom ,że bez tego ani rusz bo porzondek musi być toż wykonujom polecynia swojich kierownikow jak yno umiom. Chodzom na pruby i ćwiczom przinajmi roz w tydniu. A tera trocha historje Zespołu. Zespół Ludowy Karolinki łostoł założony we 1960 r. przi Kole Gospodyń Wiejskich we Jankowicach a prowadziła go p.Hildegarda Sobik zaś jak by to pedzieć powołoł do życio p.Kazimierz Ambroży .S poczontku swoji działalności liczoł pora miejscowych Gospodyń . Jak pedzioł jedyn s gości na wczorajszym fajerowaniu ,że „Zespoł mioł śpiywać yno 1 roz s jednom pieśniczkom” a tera niy idzie zliczyć wiela tych pieśniczek i wystympow było. Piyrszo prowadzonco Zespołu p.H.Sobik nie myślała co wiyncy ani Ji sie śniło, że tak to sie piyknie rozkulo .Członkiń kiere wstympowały do Zespołu było s roku na rok coroz wiyncy .Dzisioj Zespoł liczy 23 śpiywakow w tym 10 Karlikow bo łod dobrych pora lot w Zespole som i chłopy. Niy bydymy za wiela szkryflać ło osiongniyncach „Karolinek” bo by niy stykło placu żeby wszystko ujońć. Styknie łobejrzeć sala w kieren ćwiczom bo tam łod dyplomow i wyróżniyń mogli by my dostać zawrotu gowy. Tukej podomy yno te ważniejsze i te s łostatnich lot.

I tak zdobywajonc nagrody i wyróżniynia wziyny udział we Brzeszczach, we VI Festiwalu Prziśpiywek Wiejskich we Szczytnej,we Miyndzynarodowym Przeglondzie Zespołow Ludowych we Kudowie, Pstrążnej, Polanicy Zdroju ,we Miyndzynarodowym Przeglondzie Zespołow Ludowych Ziym Pogranicznych „Róża Kłodzka”, we Przeglondzie Zespołow Regionalnych Ja„Złoty Kłos”i wiela wiela jeszcze inszych,.W łońskim roku doszło 1 miejsce w Ogólnopolskim Przeglondzie Zespołow Artystycznych z Terynów Wiejskich we Lichyniu . Jakby tego było mało we Koszęcinie na I Edycji „Rozśpiewany Śląsk” dostały wyróżniyni zdobywajonc przed tym 1 miejsce we XXX Regionalnym Przeglondzie Pieśni „Śląskie Śpiewanie ” .We 2010 roku Zespoł dostoł łodznaka „Zasłużony dla Kultury Polskiej”. W tym roku Karolinki dostały Puchar Dyrektora Ślonskigo Ośrodka Doradztwa Rolniczego w Mikołowie /Wojewódzki Przeglond Kolyndowe we Suszcu/

Na 55 lecie geburstaku Zespołu przijechoł som Szef Wojewódzkiego Związku Rolników Kołek i Organizacji Rolniczych p.Andrzej Krawczyk kieryn w dowod tego jak mo w zocy nasze Karolinki wrynczoł osobiście kożdymy członkowi Zespołu dyplom. Coż dodać yno tela ,że Zespoł niy yno urozmaico uroczystości we swoji Gminie jak i reprezyntuje swoja Mało Ojczyzna na zewnontrz i za granicami kraju. We 2008 roku na zaproszyni „Domu polskigo” Caccia we Rumuni zaprezyntowały swoji pieśniczki w bazylice dlo Polonii polski. Zespoł Karolinki swojom ciynżkom robotom i zdyscyplinowaniym doszoł do tego co je rozsławiajonc nasza miejscowoś niy yno na Slonsku ,we kraju ale i za granicom. Trza prziznać niy było by tego bez pomocy downych i teraźniejszych Włodarzy z wójtym p.Tomaszym Pieczką i szefowom GOKi R p.Haliną Karwot. To na nich szło i idzie dycko liczyć jak se rozchodzi ło pomoc we załatwiyniu spraw organizacyjnych jak i zwionzanych miyndzy innymi s dojazdym na imprezy czy przeglondy. Nigdy nie pedzom niy i niy zawiedom za co w imiyniu Zespołu i mieszkańcow gorko im dziynkujymy. W tym roku je tako podwójno okazjo do fajerowanio niy yno geburstaku 55- lecio ale i 10- lecio jak Karolinki poszły pod krzidła GOKi R . My znomy Karolinki ze „Spotkanio Gwar” jako ,że towarzyszom naszej ekipie na trefie łod samego poczontku toż ze swoji strony życzymy im jeszcze roz tela samo lot ,żeby te ślonski pieśniczki kiere śpiywajom wkładajonc we nich całe swoji serce radowało nasze pokolyni jak i Tych co przidom po nas .Żeby było tak jak we tej śpiywce „Pieśniczko slonsko pieśniczko ” yno s tom różnicom ,żeby ta pieśniczka była radościom pszocim już na dycko .
. ……………………………….
„..Pieśniczko ślonsko pieśniczko
znodłaś korzyni ślad
w starym albumie wspomniyń
leżałaś tela lot
Śpiywały cie Karolinki
na skrzidłach ponios ptok
byłaś radościom pszicim
bez tela tela lot…….…………

foto i tekst Regina Sobik